അമ്മാഞ്ചേരിക്കാവിൽ ശുദ്ധികലശവും പരിഹാരക്രിയകളും ഇന്ന് തുടങ്ങും
വേങ്ങര: വേങ്ങര അമ്മാഞ്ചേരിക്കാവ് ഭഗവതീക്ഷേത്രത്തിൽ ശുദ്ധികലശവും പരിഹാരക്രിയകളും ചൊവ്വാഴ്ച തുടങ്ങും. കാലത്ത് ആറിന് അഭിഷേകം, മലർനിവേദ്യം, ഉച്ചപൂജ, ഗണപതിഹോമം തുടങ്ങിയ പുരിപാടികൾക്കുശേഷം വൈകീട്ട് ഏഴിന് അത്താഴപൂജയോടെ നടയടയ്ക്കും. ബുധനാഴ്ച മലർനിവേദ്യം, സപ്തശുദ്ധി അഭിഷേകം, വിളിച്ചുചൊല്ലി പ്രായശ്ചിത്തം, ഭഗത്സേവ, വിഷ്ണുസഹസ്രനാമജപം തുടങ്ങിയ ചടങ്ങുകളും രാവിലെ അന്നദാനവും ഉണ്ടാവും.
വ്യാഴാഴ്ച പ്രാസാദശുദ്ധി ക്രിയകൾ, വാസ്തുബലി, ഭഗവത്സേവ തുടങ്ങിയ ചടങ്ങുകളുണ്ടാകും. അത്താഴപൂജയ്ക്കുശേഷം നടയടയ്ക്കും. വെള്ളിയാഴ്ച ബിംബശുദ്ധി കലശാഭിഷേകങ്ങൾ, സായൂജ്യപൂജ, 25 കലശത്തോടെയുള്ള ഉച്ചപൂജ തുടങ്ങിയ ചടങ്ങുകൾക്കുശേഷം വൈകീട്ട് ഏഴിന് അത്താഴപൂജയോടെ ചടങ്ങുകൾ സമാപിക്കും. തന്ത്രി കുട്ടല്ലൂർ നാരായണൻ നമ്പൂതിരി, എളമ്പിലക്കാട്ട് ആനന്ദ് നമ്പൂതിരി എന്നിവർ കാർമികത്വം വഹിക്കും.