ലോക ജലദിനത്തിൽ ജലം ജീവാമൃതം എന്ന സന്ദേശമുയർത്തി കുരുന്നുകൾ
പെരുവള്ളൂർ: ലോകജല ദിനത്തോടനുബന്ധിച്ച് ഒളകര ഗവൺമെൻറ് എൽ പി സ്കൂൾ വിദ്യാർത്ഥികൾ വിദ്യാലയത്തിന് സമീപത്തുള്ള കുളത്തിന് ചുറ്റിലുമായി കരവലയം തീർത്ത് ജല സംരക്ഷണ പ്രതിജ്ഞ ചൊല്ലി.അയൽപക്ക വീടുകളിലും, സ്ഥാപനങ്ങളിലും ജലസംരക്ഷണ പോസ്റ്റർ പതിച്ച വിദ്യാർത്ഥികൾ, കിളികൾക്കായി ഈ ദിനത്തിൽ തണ്ണീർകുടം ഒരുക്കി കാരുണ്യത്തിന്റെ വഴി കാണിക്കാനും മറന്നില്ല.ജല ദിനത്തോടനുബന്ധിച്ച് വിദ്യാർഥികൾക്കായി പോസ്റ്റർ നിർമ്മാണ മത്സരവും, ബോധവൽക്കരണ ക്ലാസും സംഘടിപ്പിച്ചു. അധ്യാപകരായ സോമരാജ് പി, കെ കെ റഷീദ് ,വി ജംഷീദ് ,ഷാജി പി കെ ,അബ്ദുൽ ബാരി എന്നിവർ പരിപാടികൾക്ക് നേതൃത്വം നൽകി.